ປັດຈຸບັນ ສປປ ລາວ ມີເຄືອຂ່າຍໂທລະຄົມມະນາຄົມ ທຽບເທົ່າສາກົນ, ສາມາດເຊື່ອມໂຍງກັບສາກົນ ໄດ້ເປັນຢ່າງດີ ສະແດງອອກມີສັນຍານ ຄວບຄຸມພື້ນທີ່ 90% ຂອງປະເທດ ໃນນີ້ ໃຫ້ບໍລິການລະບົບ 3G, 4G ປະມານ 60-70% ຂະນະດຽວກັນ ຈຳນວນ 95% ຂອງປະຊາກອນລາວ ແມ່ນມີໂທລະສັບມືຖືໃຊ້ ແຕ່ສ່ວນໃຫຍ່ແມ່ນມີໄວ້ໂທ ຕິດຕໍ່ກັນທຳມະດາ, ປະມານ 25% ແມ່ນໃຊ້ ຫລິ້ນອິນເຕີເນັດ ແລະ ໃຊ້ໃນທາງມີປະໂຫຍດແທ້ໆ ມີປະມານ 10%.

 

 

  ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ໃຫ້ສຳພາດຕໍ່ສື່ມວນຊົນ ໃນໂອກາດເຂົ້າຮ່ວມກອງປະຊຸມເປີດກວ້າງ ຂອງລັດຖະບານ ກັບ ບັນດາແຂວງ, ເຈົ້າແຂວງ ເມື່ອບໍ່ດົນມານີ້ ຢູ່ນະຄອນຫລວງວຽງຈັນ ວ່າ: ຍ້ອນເຫັນໄດ້ຄວາມສຳຄັນ ຂອງວຽກງານດັ່ງກ່າວ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ຜ່ານກົດໝາຍ ICT ໃນກອງປະຊຸມສະພາຜ່ານມາ ແລະ ຜ່ານດຳລັດ ເລື່ອງສູນຂໍ້ມູນຂ່າວສານ ແລະ ການສຶກສາ. ນອກນີ້, ຍັງໄດ້ສຳເລັດການເອົາລະຫັດສູງສຸດ ທາງອິນເຕີເນັດດ໋ອດລາ (.la) ທີ່ໄດ້ໃຫ້ບໍລິສັດຕ່າງປະເທດເຊົ່າ ເພື່ອໃຫ້ບໍລິການຢູ່ຕ່າງປະເທດ ເປັນເວລາ 10 ກວ່າປີ ກັບຄືນມາໄດ້ ແລະ ເອົາເຂົ້າຢູ່ໃນ ສູນມະຫາວິທະຍາໄລແຫ່ງຊາດ ເປັນທີ່ຮຽບຮ້ອຍແລ້ວໃນ ໄລຍະ 2-3 ເດືອນຜ່ານມາ ຍ້ອນວ່າລາວ ເຮົາມີຄວາມພ້ອມທາງດ້ານເຕັກນິກ, ລະບຽບ, ຂັ້ນຕອນ, ຄວາມປອດໄພຕ່າງໆ  ກໍຄືໄດ້ປະກອບອຸປະກອນການແຂ່ງຂັນ ກ່ຽວກັບການຮອງຮັບທາງໂທລະສັບຂາເຂົ້າ ໄດ້ເປັນຢ່າງດີ, ພ້ອມຕິດຕັ້ງອຸປະກອນ ລວມສູນກາງດ້ານໂທລະຄົມມະນາຄົມ ໂດຍຜ່ານສາຍອິນເຕີເນັດແຫ່ງຊາດ ຖືເປັນປັດໄຈສຳຄັນທີ່ສຸດ  ທີ່ພົວພັນເຖິງວຽກງານດ້ານ ຄວາມປອດໄພແຫ່ງຊາດ ໄປຄຽງຄູ່ກັບການສ້າງບຸກຄະລາກອນ ເທື່ອລະກ້າວ ໂດຍຜ່ານສະຖາບັນໄປສະນີ ໂທລະຄົມມະນາຄົມ ແລະ ການກໍ່ສ້າງກັບທີ່ ໂດຍການສ້າງພະນັກງານ ໄປຝຶກອົບຮົມຢູ່ພາຍໃນ ແລະ ຕ່າງປະເທດ.

 

ຂອບໃຈແຫຼ່ງຂ່າວຈາກ: http://www.devcrown.com/  ແລະ ຂປລ